LIM DO SAMAÍN

Esta semana estivemos adicándolle uns minutiños á pantalla interactiva. Xogamos con este LIM do Samaín, facendo crebacabezas e tamén un memory. Seguiremos xogando nos vindeiros días. Animádevos a xogar desde a casa!

CHEGARON AS MOMIAS

Aproveitando que estamos nunha semana moi terrorífica, decidimos convertirnos en momias dun xeito diferente. Deunos algo de traballo a tarefa, pero coa axuda de María conseguimos transformarnos nunhas momias moi xeitosiñas. Ata lle pillamos gusto ao baile das momias!

A bailar todos e todas no Samaín!

A CABAZA DO SAMAÍN

 Chegamos á tan desexada semana do Samaín, que inaguramos coñecendo a fondo unha das froitas máis típicas do outono, a cabaza. Observamos a súa cor, o seu tamaño, o peso e puidemos tocar e comprobar a súa textura interna, ademais de coñecer as súas sementes.

Como falta pouco para o Samaín, a nosa aula non podía quedar sen unha cabaza alumeante, polo que estivemos falando de que como facerlle os ollos e a boca para espantar os malos espíritus e de paso, se asustamos ao Coronavirus, pois tamén nos serve.

Logo vimos un conto que nos gustou moito chamado "Corre corre, cabaciña" e pedimos repetilo varias veces, ata estivemos cantando a súa canción. Deixámosvos o enlace aquí para que tamén o poidades ver todos vós.

Para rematar a xornada da cabaza, decoramos as nosas propias cabazas poñéndolle ollos, nariz e boca, algunhas cabazas estaban contentas, algunhas tristes e outras medorentas e asustadas.

Mirade, mirade.... non teñades medo delas!!

AS ÁRBORES DO OUTONO

A semana pasada estivemos observando distintas paisaxes do outono e descubrimos que moitas das árbores cambian a cor das súas follas. Tamén puidemos descubrir cales son as cores máis comúns nas follas que cambian.

Con estes pequenos descubrimentos, puxémonos mans á obra e elaboramos as nosas propias árbores e follas do outono, que nos serviron para decorar e ambientar o corredor do noso centro.

Menudos e menudas artistas estamos feitos!!

CHEGOU O OUTONO Á NOSA AULA

Os peques do Pecalama inauguramos o outono, na nosa aula, coa visualización dunha fermosa historia de amizade, na que descubrimos que a partir das landras saen os carballos. Este foi o punto de partida para investigar como é o outono e que cousiñas nos pode ofrecer. Xa vos iremos contando o que averiguamos.

PASIÑO A PASIÑO

Pasiño a pasiño imos aprendendo máis cousas e sendo máis autónomos. Tódolos días realizamos as mesmas rutinas, que nos axudan a sentirnos máis seguros e ter confianza en nós mesmos. A asamblea inicial é a base do noso día, nela falamos, cantamos, escollemos o encargado e marcamos o punto de partida das numerosas actividades que imos a facer.

Botádelle un ollo!!

INSTALACIÓN DA APLICACIÓN DE ABALARMÓBIL

 

A Xunta de Galicia, coa finalidade de aumentar o achegamento entre o profesorado e as familias, ofrece a aplicación ABALARMÓBIL. Trátase dunha aplicación que permite ás familias consultar a información dos seus fillos e fillas, a través do teléfono móbil dende calquera lugar, de forma cómoda e rápida (cualificacións, faltas de asistencia, faltas de conduta, datos do centro, avisos, etc).

Para acceder á aplicación podedes utilizar a GUÍA PARA O SEU USO E INSTALACIÓN clicando neste mesmo enlace ou visualizando o seguinte vídeo. Se tedes algunha dúbida podedes chamar ao centro escolar ou consultalo coa titora.

ANIVERSARIO DE HUGO

 Hoxe estivemos de celebración na aula dos Pecalamiños. O noso amigo Hugo cumpriu 3 aniños. Aínda que non puidemos saborear un bo doce por motivos do COVID-19, a festa non desmereceu nadiña; bailamos, cantamos, fixemos fotos e elaboramos un super agasallo para Hugo.

Esperamos que o pasases moi ben no teu aniversario.

MOITOS PARABÉNS AMIGOO!!!